Dili kinahanglan nga gamiton ang “non-invasive mechanical ventilation” aron makaginhawa si Pope Francis. Kini base sa pamahayag sa Vatican nga gipagawas alas dos karong buntag oras sa Pilipinas.
Matod sa Holy See, nagpabiling stable ang kahimtang sa 88 anyos nga Santo Papa, wala kini hilanat, apan nagkinahanglan lang siya og supplemental high-flow oxygenation o pinaagi sa gamay nga hose sa iyang ilong.
Kaniadtong Domingo sa buntag didto sa Roma, nakigbahin usab ang Santo Papa sa Santos nga Misa uban sa mga nag-atiman kaniya samtang naa siya sa ospital. Human niini, nag-ampo ug mipahulay ang Santo Papa.
Napamatud-an nga duha ka opisyal sa Vatican ang nakigtagbo sa Santo Papa, ug gipaabot usab nila ang ilang pagpasalamat sa mga nag-ampo kaniya.
Ang ikaduhang labing taas nga opisyal sa Vatican nga si Cardinal Pietro Parolin ug ang iyang deputy mibisita usab kaniya sa ospital apan wala ipagawas sa Vatican ang ilang gisulti.
Niadtong Pebrero 24, hinumdomi nga nakigsulti usab ang Santo Papa kang Parolin ug sa iyang deputy sa Gemelli Hospital.
Ika-17 na kini nga adlaw ni Pope Francis sa tambalanan tungod kay aduna siyay double pneumonia o grabeng impeksyon sa duha ka baga nga maglisod siya sa pagginhawa.
Walay bisan usa ka hulagway o video sa Santo Papa nga napakita sa publiko sukad siya nadala sa tambalanan niadtong Pebrero 14.
Mao usab kini ang labing dugay nga panahon nga wala makakita kaniya ang mga matuuhon sukad siya milingkod isip pangulo sa Simbahang Romano Katoliko niadtong Marso 2013.
