Anaa sa 95% nang andam ang Commission on Elections (COMELEC) para sa nagkaduol nga national and local elections sa Mayo 12, 2025. Sa usa ka press conference, gisiguro ni COMELEC Chairman George Garcia nga nasunod ang iskedyul sa ahensiya, bisan sa pipila ka hagit nga naagian, lakip na ang mga kamandoan sa korte kalabotan sa diskwalipikasyon sa pipila ka kandidato.
Matod kang Garcia, naimprenta na ang 45 million sa 72 million nga opisyal nga balota hangtod ning semana.
Bisag nakaangkon og duha ka semana nga pagkadelatar, target gihapon sa COMELEC nga mahuman ang pag-imprenta sa Marso 19, samtang ang beripikasyon sa mga balota ang gitakda gikan Abril 10 hangtod 20.
Sa ulahing bahin sa Marso, posibleng mapadala na usab ang mga election paraphernalia og voting machines sa lagyong lugar para masiguro nga andam ang mga polling precincts sa adlaw sa eleksyon.
Dugang pa niini, nahuman na usab ang pagbansay sa mga supervisor sa Department of Education (DepEd) og mga principal samtang gikatakda usab nga sugdan ang training sa Electoral Board sa sunod nga semana.
