Mas gipahugtan pa sa Sarangani Province ang mga kampanya kontra sa sakit nga dengue.
Kini human nga malampusong gilusad sa Sarangani Provincial Health Office (PHO) ang “Alas-Kwatro Kontra Mosquito” nga inisyatiba niadtong Pebrero 24, nga nagpasiugda sa importansya sa pagwagtang sa mga breeding ground sa Aedes aegypti nga lamok, ang nag-unang tigdala sa Dengue fever.
Ang inisyatiba nagtumong sa pagpakunhod sa risgo sa mga sakit nga dala sa lamok, sama sa Dengue ug Malaria. Ang report sa PHO gikan sa morbidity week 8 (Pebrero 9–15) nakatala ug 211 ka kaso sa dengue, nga nagpakita sa 47.25% nga pagkunhod gikan sa 400 ka kaso nga gitaho sa samang panahon sa miaging tuig.
Aron pagsuporta sa kampanya, ang Provincial Local Government Unit (PLGU) sa Sarangani mimando sa mga empleyado sa Kapitolyo sa pag-apil sa dungan nga pagpanglimpyo matag Martes ug Biyernes sa alas 4:00 sa hapon.
Hinuon, giklaro ni Human Resource Management Officer Josephine Alog sa usa ka memorandum nga kinahanglang magpabiling walay hunong ang mga operasyon sa opisina ug paghatod sa serbisyo.
Giawhag usab ni Gobernador Rogelio D. Pacquiao ang tanang mga Sarangan nga aktibong moapil sa cleanup drive, nagpasiugda sa pasalig sa PLGU sa pagkontrola sa mga sakit nga dala sa lamok ug pagpanalipod sa panglawas sa publiko.
