Nagpadayag ug kabalaka si Bureau of Immigration (BI) Commissioner Joel Anthony Viado sa nagkadaghan nga kaso sa human trafficking nga gama sda mga sindikato sa catfishing.
Sa usa ka pamahayag, gibutyag ni Viado nga 14 ka mga biktima ang na-intercept sulod sa usa ka semana, nga misuway sa pagbiya alang sa ilegal nga trabaho sa mga scam hub sa gawas sa nasud.
Ang unang batch sa mga pag-aresto niadtong Pebrero 4, sa dihang ang tulo ka mga biktima, nag-edad og 33, 25 ug 27, naluwas sa NAIA Terminal 1 samtang misulay sa pagsakay sa Philippine Airlines flight paingon sa Thailand.
Ang Immigration Protection and Border Enforcement Section (I-PROBES) sa BI nitaho nga ang mga pasahero daw first-time nga mga biyahedor sa usa ka self-funded trip ngadto sa Thailand.
Tungod sa nagkasumpaki nilang mga tubag sa pangutana sa mga personahe sa BI, gipaubos sila sa dugang inspeksyon.
Didto giangkon sa mga biktima nga gi-recruit sila aron magtrabaho sa Cambodia isip customer service representative sa usa ka business process outsourcing (BPO) company.
Niadtong Pebrero 5, dugang 11 ka biktima sa trafficking nga nagpaila sa ilang kaugalingon nga mga estudyante ang na-intercept samtang misulay sa pagsakay sa susamang airline paingon sa Bangkok, Thailand.
Atol sa pagpangutana, ilang giangkon nga gisaaran sila og P50,000 matag buwan nga suweldo aron makatrabaho sa usa ka giingong BPO sa Pakistan ug giingnan nga itago ang ilang mga Pakistani visa.
