Wala matingala ang mga lider sa balay nga daghang mga Pilipino ang misuporta sa impeachment batok kang Bise Presidente Sara Duterte.
Base sa survey, 41 porsiyento sa mga Filipino ang misuporta sa pagpalagpot sa bise presidente tungod sa daghang ebidensiya kalabot sa sayop nga paggamit sa pundo.
Kini ang reaksyon ni House Assistant Majority Leader ug Zambales 1st District Rep. Jay Khonghun ug Deputy Majority Leader ug La Union 1st District Rep. Paolo Ortega V.
Matod sa duha ka house leaders, ang maong survey nagpakita nga dili ganahan ang mga Pinoy sa sayop nga paggasto sa P612.5 milyones nga confidential funds nga gigahin sa Office of the Vice President. (OVP) ug ang Department of Education (DepEd) sa dihang si VP Sara pa ang kalihim.
Giingon ni Khonghun nga gusto sa publiko nga mahimong responsable sa paggasto sa mga pondo sa publiko.
Sa pagkakaron tulo na ka kaso sa impeachment ang napasaka sa Kamara batok kang VP Sara diin giakusahan siya og gross incompetence, betrayal of public trust ug deliberate misuse of public funds.
Sa habig ni Rep. Ortega nga ang mga Pilipino angayan nga masayod sa kamatuoran ug ang ilang pagsuporta sa impeachment usa ka pagpasundayag nga kinahanglang adunay transparency ug hustisya.
