Naduso na ni Presidential Adviser on Poverty Alleviation (PAPA) Sec. Larry Gadon ngadto sa Korte Suprema ang disbarment case kontra kang Vice President Sara Duterte-Carpio.
Kini may kalabotan sa pagpamalikas og pagbahad sa bise presidente batok kang Pangulong Ferdinand R. Marcos Jr., First Lady Liza Araneta-Marcos, og House Speaker Martin Romualdez.
Gibutyag ni Gadon nga klaro matod pa ang gihimong paglapas ni VP Sara sa Cannon Law og Conduct of Ethical of Professional Responsibility isip usa ka abogado.
Dungan niini, gihagit ni Sec. Gadon ang Korte Suprema nga mahimong patas og makatarunganon. Gihimo sa kalihim ang pahayag dungan sa pagsumite niini og disbarment case batok kang VP Sara Duterte.
Matod kay Gadon, sulayan niya ang Korte Suprema kung kaya nga ma-disbar si Duterte sama sa gihimong pagdisbar kaniya sa miaging tuig.
Mag-file usab kini og impeachment case kontra sa mga justices sa Korte Suprema kung dili nila aksyunan ang iyang petisyon.
Samtang, gikumpirma usab ni Atty. Camille Ting, tigpamaba sa Supreme Court, nga may nauna nga gipasang-at nga disbarment batok kang VP Sara kaniadtong Oktubre 2024 gikan sa usa ka ‘anonymous sender’ nga may kalabotan usab sa nahimong pahayag niini nga ipakalot niya ang mga patay nga lawas ni kanhi Pangulong Ferdinand Marcos Sr. sa Libingan ng mga Bayani og ilabay sa West Philippine Sea.
Gawas niini , natanggong usab sa Korte Suprema ang usa pa nga disbarment ni Duterte nga may kalabotan usab sa pagpanumbag niya sa usa ka Sheriff niadtong siya ang mayor pa sa Davao City.
