Posible nga hinganlan ni US President-elect Donald Trump si incumbent Florida Senator Marco Rubio isip Secretary of State, base sa mga taho gikan sa US-based international news organizations.
Si Rubio usa sa mga kritiko kaniadto sa napiling presidente sa Estados Unidos.
Sa 2016, samtang si Rubio nangita sa Republican presidential endorsement batok kang Trump, iyang gitawag si Trump nga usa ka ‘con artist’ ug ang labing bastos nga tawo nga iyang nailhan sukad nga nagtinguha nga mahimong presidente.
Bisan pa, ang pipila nga duol sa kampo ni Trump nagpaila kang Rubio nga usa sa mga nag-unang kandidato nga mahimong Sekretaryo sa Estado.
Si Rubio anak sa magtiayong Cuban nga imigrante nga nanimuyo sa Miami.
Nakuha niya ang degree sa Political Science kaniadtong 1993 sa University of Florida.
Una siyang napili sa Senado sa US kaniadtong 2010.
Sa pagkakaron adunay daghang mga personalidad nga ginganlan ni Trump isip kabahin sa iyang gabinete. Usa niini mao si Tom Homan isip border tsar sa US ug New York Representative Elise Stefanik isip US Ambassador sa UN.
