TUPI SOUTH COTABATO – Nakabsan sa kinabuhi ang drayber sa usa ka motorsiklo samtang naangol ang angkas human nabangga sa usa ka pickup truck sa Purok 8, Barangay Acmonan, Tupi, South Cotabato.
Giila ang namatay nga si Pejei Masamlok Magon, 28-anyos, minyo ug residente sa Sitio Lamlatang, Brgy Juan Loreto Tamayo sa nahisgutang lungsod samtang nagpabilin ang iyang igsuong babaye sa balay tambalanan human na angol nga si Daylene Masamlok Magon kinsa residente usab sa nahisgutang lugar.
Sa inisyal nga imbestigasyon sa mga otoridad, usa ka pick up ang nadasmagan sa motorsiklo nga gimaneho ni Pejei ug tungod sa kakusog sa impact nalagpot kini ug nakaangkon og daghang samad sa nagkadaiyang parte sa lawas.
Samtang anaa sa kustodiya sa Tupi PNP ang drayber sa pick-up nga giilang si Alexander Gica Lim, 67-anyos ug residente sa Purok Cadellara, Barangay Poblacion sa nahisgutang lungsod.
