Niabot sa kinatibuk-ang P12,155,568.62 ang gitino nga kantidad sa kadaot nga gibilin sa bagyong Kristine sa power sector.
Kini base sa pinakaulahing assessment ug validation sa National Electrification Administration (NEA) – Disaster Risk Reduction and Management Department (DRRMD).
Diin gikan lang sa partial report sa pipila ka electric cooperatives nga naglakip sa QUIRELCO, ABRECO, BENECO, NEECO II-Area 1, MARELCO, TIELCO, FICELCO, AKELCO, NONECO, SAMELCO 1 ug LEYECO 5.
Ingon man nga tulo ka EC ang padayong nagpahigayon og massive restoration operations aron mabalik ang saktong suplay sa kuryente sa mga konsumidor: Pangasinan I Electric Cooperative (Panelco I), Batangas 1 Electric Cooperative, Inc., ug Camarines Sur I Electric Cooperative, Inc.
Basi gihapon sa report sa NEA, aduna pa’y 45 ka EC ang nakasinati og partial power interruption.
Mibalik na usab sa normal nga operasyon ang ubang mga EC nga naglangkob sa kinatibuk-ang 515 ka lungsod nga naapektuhan sa bagyo.
Mokabat sa 12 ka rehiyon sa tibuok nasud ang nakasinati og problema sa suplay sa kuryente dungan sa pagguba sa bagyong Kristine.
