Mga Ka-Bombo nakakita ka na ba og bata nga morag palad lang kadako?
Mao kini ang sitwasyon ni Baby Robyn nga gihimugso sa iyang inahan sa miaging Marso 2023 dihang naga-edad pa lamang kini og 23 ka semana og duha ka adlaw.
Buot pasabot niini, lima ka bulan nga mas sayo siya nga nag-abot kaysa sa petsa nga mao gyud unta ang paggawas niya sa kalibutan.
Dihang nahimugso si Baby Robyn, 11 oz lang gyud ukon 328 grams ang iyang timbang og ang iyang palad ang morag sama lang gyud kadako sa kuko sa tawo.
Bisan mao siya niini kadako dihang gihimugso sa Grange Hospital sa Torfaen sa Wales,Great Britain, wala gyud nawad-an og paglaum ang iyang 34-anyos nga inahan nga si Chantelle og 38-anyos nga amahan nga si Daniel.
Adunay fundraising nga gihimo alang sa treatment sa baby samtang ginabutang lang kini sa sandwich bag aron matabunan ang iyang vital organs.
Dili man kini makugos tungod gina-oxygen ang bata og ginapakaon pinaagi sa tubo sa iyang ilong og baba, gina-monitor ang vital signs sa tanan nga higayon og adunay 30 ka doses sa tambal matag adlaw.
Apan isog kaayo si Baby tungod makalabay ang unom ka bulan, nabalhin na siya sa pediatric intensive care unit sa Children’s Hospital hangtod napagawas na sa miaging bulan sa Septyembre sa labing-una nga higayon sulod sa usa ka tuig og tunga.
Hilabihan ang kalipay sa mag-asawa nga normal sila nga magpamilya sa usa ka balay.
Dako na karon ang baby, blonde ang buhok, og chubby na ang iyang lawas apan adunay feeding tube pa gihapon kini sa ilong og adunay oxygen tube sa iyang baba.
Giangkon sa mga ginikanan nga nagtuo sila sa una nga imposible na nga mabuhi pa ang ilang anak.
Nadiskubre usab nga aduna kini brain damage unom ka bulan human nahimugso apan nagpabilin nga positibo ang mag-asawa tungod nakahibalo sila nga walay imposible kauban ang ilang baby Robyn.
Adunay gihimo usab nga social media page nga “robyn’s rainbow story” aron matabangan usab ang uban nga pamilya nga adunay sama nga sitwasyon og aron nga makatabang usab sa fundraising alang sa mga equipment og therapies alang sa padayon nga pag-ayo sa bata.
