Adunay mga tawo nga makulbaan sa pagsakay sa eroplano.
Unsa pa kaha kung ikaw na ang magpalupad niini, og samot pa gyud kung walay kahibalo kun unsaon kini imaneho??
Mao kini ang nahitabo sa mag-asawa didto sa Estados Unidos sa Amerika dihang naabtan sila og emergency samtang anaa sa kawanangan.
Ang piloto mao si Eliot Alper, 78, samtang kauban niini sa gamay nga eroplano ang iyang asawa nga si Yvonne Kinane-Wells, 69.
Gikan sila sa Henderson Executive Airport sa Las Vegas og paadto na unta sa Monterey, California.
Samtang nagalupad ang eroplano, kalit lang nga giatake sa kasingkasing ang piloto.
Sa una, grabe ang panic sa asawa tungod gawas nga naglain ang kondisyon sa iyang bana, dili pa siya makahibalo magmaneho sa eroplano og wala gyud kini kaagi nga mag-training aron magmaneho og eroplano.
Apan ‘mind over matter’, nangisog kini sa flight deck, gikontak ang air traffic controller, og gissunod ang tanan nga ginasulti gikan sa radyo.
Pipila ka minutos ang milabay, natigayon ang emergency landing sa Bakersfield, California kun asa nagahulat ang emergency vehicles hangtod nga gilayon nga napahunong sa asawa ang eroplano.
Gidala gilayon ang bana sa ospital, apan mao na lang ang paghilak sa asawa tungod gibawian gihapon sa kinabuhi ang iyang bana.
Daghan gyud ang nakadayeg sa pagka-kalmado sa babaye og bisan ang director sa airport ang mibilib og gibutyag nga wala pa siya nakaagi sa susamang insidente sa iyang tibuok nga karera.
Isip pagsunod sa proseso, adunay imbestigasyon sa gihapon nga ipahigayon ang Federal Aviation Administration og National Transportation Safety Board kalabot sa maong insidente.
