Giila pag-usab ang Boracay Island isip ikatulo nga labing matahom nga isla sa Asya base sa 2024 Condé Nast Traveler Readers’ Choice Awards.
Naka-iskor kini og 91.94 puntos nga nagpamatuod nga paborito kini nga destinasyon sa mga turista.
Ang ubang mga sikat nga isla sa Pilipinas nga nalakip sa Top 10, mao ang Palawan nga anaa sa ikaunom nga puwesto, Cebu ug Visayan Islands anaa sa ikawalo ug Siargao sa ikanapulo nga puwesto.
Kapin sa tunga sa milyon nga mga turista ang nagboto sa prestihiyosong survey nga gihimo sa Condé Nast Traveler, usa ka inila nga luxury ug travel magazine.
Ang maong mga pag-ila maoy subling nagpamatuod nga padayong nanguna ang Pilipinas isip usa sa mga nag-unang destinasyon sa mga turista.
Base sa pinakaulihi nga datus sa Malay Tourism Office, miabot na sa 121,975 ka mga turista ang naghidangat sa isla sa Boracay sa bulan lamang sa Setyembre.
Sa nasangpit nga gidaghanon, 100,497 ang domestic tourists; 1,010 ang overseas Filipinos ug 20,468 ang foreign tourists.
