Gihimakak ni kanhi Presidential spokesperson Atty. Salvador Panelo nga si kanhi Presidente Rodrigo Duterte modagan pagka-senador sa 2025 midterm elections.
Kini ang giklaro ni Panelo taliwa sa mga taho nga niatras ang kanhi Presidente sa iyang kandidatura pagka mayor sa dakbayan sa Davao aron modagan pagka Senador. Matod niya, fake news kini.
Usa usab ka suod nga katabang ni ex-PRRD nga nagdumili pagpaila, niingon nga dili modagan pagka Senador ang kanhi Presidente.
Bisan kung gikumpirma niini nga si Duterte naa karon sa Metro Manila, iyang giklaro nga miadto siya sa NCR alang sa pipila sa iyang mga naunang pasalig.
Giklaro usab niini nga wala gi-withdraw ni ex-PRRD ang iyang kandidatura pagka mayor sa Davao City.
Si Duterte ug iyang mga anak nga sila si Baste ug Paolo Duterte mi-file sa pagka mayor, bise-mayor ug kongresista sa unang distrito sa Davao City niadtong Lunes, Oktubre 7.
