Dul-an sa 80 ka tawo patay human maunlod ang usa ka lantsa sa Congo

Labing menos 78 ka mga tawo ang namatay human natikyaob ang usa ka lantsa sa Lake Kivu, sa silangang Democratic Republic of Congo, kung asa anaa na lang matud pa unta sa usa ka gatos ka metros makaabot na sa ilang destinasyon ang maong sakayan.

Sumala sa taho, nagbiyahe ang sakayan gikan sa lungsod sa Minova sa South Kivu, apan nalunod kini paglatas sa baybayon sa Goma.

Matod sa mga otoridad sa lugar, adunay 278 ka mga pasahero sa barko dihang nahitabo ang trahedya.

Human ma-rescue ang pipila ka mga pasaherong naangol, dali silang gidala sa tambalanan.

Matud sa usa sa mga survivor, linaw ang dagat dihang mibiyahe sila apan kalit lang nga dunay nilihok nga mga tawo sa lantsa nga maoy hinungdan sa pagkaunlod niini.