Nagsang-at ang National Bureau of Investigation (NBI) og nagkadaiyang mga kaso batok kang dismissed Bamban Mayor Alice Guo human madiskubre nga dili kang Guo ang pirma sa iyang gipa-notaryohan nga counter-affidavit batok sa iyang human trafficking case.
Matod ni NBI Director Jaime Santiago, gipasaka ang mga reklamong falsification by a notary public, use of falsified documents, perjury, og obstruction of justice batok kang Guo og Atty. Elmer Galicia, ang abogadong nag-notaryo sa counter-affidavit.
Matod usab ni NBI Task Force Alice Guo head agent Palmer Mallari nga dili si Guo kun dili ubang tawo ang mipirma sa iyang counter-affidavit.
Kini ang migawas sa resulta sa pagsuta dihang gikumpara ang nakolekta nga specimen signatures ni Guo gikan sa mga orihinal nga dokumento sa Bamban, Tarlac og pirma gikan sa counter-affidavit niya.
Sa karon, wala pay tubag ang kampo ni Guo kalabot sa findings sa NBI og sa gisang-at niining mga reklamo.
Samtang, human sa pagsang-at og mga complaint sa DOJ, nagpasang-at usab og disbarment complaint ang NBI batok kang Atty. Galicia sa Supreme Court.
