Gibanabana nga nibulsa na og P5 bilyones ang mga negosyante sa bugas gikan sa pagpatuman sa Executive Order 62 nga nagtugot sa pagkunhod sa taripa nga gipahamtang sa imported nga bugas.
Sa usa ka pamahayag, si Federation of Free Farmers (FFF) national manager Raul Montemayor niingon nga ang retail price sa bugas wala kaayo mous-os, nga nagpasabot nga ang importers, wholesalers ug retailers nakabulsa og dul-an sa P5 bilyones nga savings.
Giingon usab niini nga sila ug dili ang mga konsumidor ang nakabenepisyo sa ubos nga taripa.
Gipahibalo usab ni Montemayor nga ang mga importer sa bugas nakadaginot og P6.70 matag kilo gikan sa kapin 800,000 ka toneladang imported nga bugas nga niabot niadtong Hulyo hangtod sa tunga-tunga sa Septiyembre nga gibaligya sa mas ubos nga taripa.
Samtang gipanghimakak ni DA Sec. Francisco Laurel Jr. ang alegasyon bisag iyang giangkon nga ang P5 matag kilo ngadto sa P7 matag kilo nga uros sa bugas nga gitagna sa mga economic managers sa administrasyong Marcos wala kaayo mabati sa mga lokal nga merkado.
