Posibleng pasakaan og mga reklamo alang sa obstruction of justice si kanhi Presidente Rodrigo Duterte tungod sa pagtago sa nahimutangan ni KOJC founder Apollo Quiboloy bisan og nasayod niini ang kanhi presidente sumala pa sa usa ka magbabalaod.
Kini gipataas sa dihang gihangyo ni House Deputy Minority leader France Castro si Ako Bicol party-list Rep. Raul Angelo Bongalon nga nanalipod sa pondo sa Department of Justice atol sa mga debate sa plenaryo sa Kamara alang sa 2025 funding proposal kon mahimong manubag si Duterte sa balaod human niingon ang kanhi presidente dihang gipangutana niadtong Hulyo nga nasayod siya kon asa si Quiboloy apan sekreto kini.
Dinhi, nangutana si Cong. Castro kon kini makonsiderar nga obstruction of justice.
Gipasabot ni Bongalon nga lain-laing elemento ang krimen.
Busa kun anaa na ang tanang elemento, kinsa man ang posibling makalapas, mahimo ang kasong obstruction of justice.
Matud pa ni Cong. Bongalon nga si kanhi presidente Duterte dayag nga niingon nga nasayod siya kon asa si Pastor Quiboloy apan nagdumili kini sa pagbutyag kay sekreto kuno kini.
Busa kining mga pamahayag sa kanhi presidente, ilabi na nga siya ang tagdumala sa mga propyedad sa KOJC, mahimong makagarantiya og posibleng kasong obstruction of justice batok niya.
Una niini, pipila ka mga magbabalaod lakip si Rep.Bongalon, nanawagan nga imbestigahan ang giingong papel sa kanhi presidente ug sa iyang mga kabanay sa pagtago sa pastor kinsa gipangita niadto sa mga otoridad aron isilbi ang warrant of arrest nga giluwatan sa korte.
Sa kampo sa kanhi presidente, unang niingon si kanhi presidential legal counsel Salvador Panelo nga administrator lang si Duterte sa KOJC properties ug dili si Quiboloy.
Gipasabot pa ni Panelo nga usa ka abogado si Duterte ug nasayod siya nga dili husto ang pagpatago sa usa ka pugante
