GENERAL SANTOS CITY – Dise nueve ka mga MILF combatants ang mibalik sa sabakan sa gobyerno samtang bitbit ang mga tag-as nga kalibre sa armas.
Kini human natigayon ang usa ka programa alang sa pagsurender sa mga sakop sa Moro Islamic Liberation Front (MILF), apil ang mga tag-as nga lider sa grupo didto sa Isulan, Sultan Kudarat.
Sumala kang Philippine Army’s 7th Infantry Batallion Acting Commanding Officer Lt Colonel Tristan Rey Vallecas nga ang nahisgutang mga MILF combatant ang mitugyan sa mga lain laing matang sa high powered firearms nga gilangkuban sa 19 units sa M16-A1 rifles; unom ka M14 rifles, tulo ka Bushmaster Carbines ug M60 heavy machine gun, M203 Grenade Launcher, mga magazines ug mga bala.
Gitudlo usab sa mga nahisgutan ang lugar gitagu-an sa mga gamit pang gyera nga gilubong sa kabukirang bahin sa lugar.
Ang pagsurender sa grupo ang giabagan sa Government of the Philippines-MILF peace mechanisms, Philippine National Police, ug Sultan Kudarat Local Monitoring Team.
Giproseso usab ang uban pang benipisyo nga mahatag sa grupo hilabi na sa kantidad sa mga armas nga gisurender.
