GENERAL SANTOS CITY – Nagmando na ang Commission on Audit ngadto kang Gensan Mayor Lorelie Pacquiao ug uban pang empliyado sa syudad nga ibalik ang cash incentives nga ilang nadawat gikan sa LGU human nga dis-allowed ang controversial nga PhP126 million kapin nga Laudable Government Performance (LGP) bonus kaniadtong 2022.
Ang notisya sa COA nga pinitsahan kaniadtong Hunyo 18 niining tuiga ang nakaabut na sa buhatan sa Mayor nga nagbutyag nga wala gitugot ug gideklara nga in-operative gumikan sa kakulang sa legal basis.
Kahinumduman nga kaniadtong 2022 nag isyu si Mayor Pacquiao ug Executive Order No. 74 aron ipagawas ang goodwill bonus sa tanan nga qualified plantilla employees ug mga opisyal alang sa laudable performance sa kantidad nga dili mulampas sa PhP100,000.
Giaprubahan usab kini sa Sangguniang Panlungsod pinaagi sa special session aron magpagawas ug supplemental budget nga PhP115,000 total bonus sa tanan nga regular, casual, ug co-terminus employees sa syudad nga gilangkuban sa PhP80,000 nga “good will bonus”, PhP25,000 Collective Negotiation Incentives (CNI) ug dugang PhP10,000 sa Service Recognition Incentive samtang midawat usab ug PhP20,000 Christmas bonus ang mga job order workers.
