Medyo nagping-it pa sa kasakit dihang gidawat sa 26-anyos nga lalaki sa dakbayan sa Lapu-Lapu ang P10,000 nga premyo human kini ngapatuli.
Ang nasampit mao’y labing tigulang nga indibidwal nga nagpatuli atol sa ‘Operasyon Libreng Tuli’ sa dakbayan sa Lapu-Lapu niadtong Biyernes, Hunyo 21.
Giila ni Lapu-Lapu Mayor Junard “Ahong” Chan ang maisugon nga lalaki nga si Alfredo Jr., residente sa Barangay Basak, Lapu-Lapu.
Personal nga gitunol ni Chan ang P10,000 cash award ngadto kang Alfredo, kinsa lakip sa 1,350 ka mga indibidwal nga naka-avail sa libreng tuli nga gipangunahan sa mga volunteer schools ug sa Department of Health-Central Visayas.
Ingon man nga gihatagan og libreng ice cream ug burger ang mga nagpatuli sa Hoops Dome sa Barangay Gun-ob, Lapu-Lapu.
Sa tema nga “Transforming lives, one cut at a time,” gisugdan sa kagamhanan sa dakbayan ang libreng tuli niadtong Hunyo 14.
Laing Operation Tuli usab ang ipahigayon karong Hunyo 28 sa siyam ka lugar sa dakbayan.
