GENERAL SANTOS CITY – Wala mituman sa kasabutan ang kampo ni Kurt Gracia, ang elf truck driver nga nalambigit sa panagbangga tali sa usa ka traysikol nga gikamatay sa unom ka mga pasahero ug pagka hospital sa laing upat ka biktima.
Matud ni Ratina Fernandez, igsuon sa traysikol driver nga si Jay Cañedo nga usa sa mga biktima nga taga Banualan, Tambler ning syudad, wala tanan mahatag ang gisaad nga tabang pinansyal nga ilang gikasabutan sa driver sa buhatan sa Traffic Enforcement Unit.
Human matud pa mipasalig kanila nga dili mabalaka, wala na gituman sa tag-iya sa elf truck ug sa driver ang ilang gisaad.
Saysay pa nag sa dihang nakagawas na sa kustudiya sa kapulisan nausab matud pa ang pahayag sa nakabangga nga muhatag na lamang ug P20,000 luyo nga nakagasto na ug P65,000 sa lungon ug P14,000 alang sa sementeryo ang pamilya sa biktima.
Gipangayu lamang matud pa nila nga bayaran ang pagpa hospital ug pagpalubong.
Kahinumduman nga unom ang patay dihang nagkabangga ang usa ka elf truck ug traysikol sa Tambler ning syudad nga adunay napulo nga sakay kaniadtong Hunyo 16 atul sa pagsaulog sa Fathers day.
