Lakip ang lima ka mga Pilipino (apil ang usa ka bata) sa kapin 30 pasahero nga nasamdan human makasinati ug grabeng turbulence ang usa ka eroplano sa Singapore Airlines.
Niadtong Miyerkules, gikumpirma sa Department of Migrant Workers (DMW), nga lakip ang lima nga Pinoy sa mga sakay sa maong eroplano nga Singapore Airlines flight SQ-321 nga gikan sa London og paingon sa Singapore.
Usa ka Briton nga pasahero ang namatay sa maong insidente nga gituohang giatake sa kasingkasing.
Sumala sa DMW, hugot nilang ginamonitor ang kahimtang sa mga nasamdang Pinoy, lakip ang usa ka 2-years old nga lalake nga kauban ang iyang mga ginikanan sa biyahe.
Usa ka Overseas Filipino Worker (OFW) nga nurse sa United Kingdom ang inahan sa bata, samtang walay record kung OFW ang iyang amahan.
Ang uban pang pasahero usa ka babayeng Singapore-based OFW nga nagtrabaho sa information technology sector ug usa ka lalaking Pinoy nga wala usab record isip OFW.
Gibutyag pa sa DMW, nga gidala ang mga Pinoy nagkadaiyang ospital sa Bangkok ug “stable” ang kahimtang.
Apan gibutyag sa mga doktor nga giobserbahan ang kahimtang sa usa ka Pinoy nga nakaangkon ug neck fracture.
Samtang gibutyag sa Department of Foreign Affairs, nga ginamonitor usab sa embahada sa Pilipinas sa Bangkok sa kahimtang sa lima ka Pinoy nga naangol sa insidente.
Gibutyag usab sa report nga sensitibo ang kahimtang sa Pinoy nga nakaangkon og bali sa liog.
