GENERAL SANTOS CITY – Gibasura sa Prosecutors Office sa Hall of Justice ning syudad ang kaso nga gipasaka sa kapulisan batuk sa setenta y kwatro anyos nga suspek sa paglugos patay sa syete anyos nga bata nga taga brgy. Conel ning syudad.
Matud ni Police Major Robert Fores, hepe sa kapulisan sa Mabuahay Police Station nga gigamit nila ang mga testimonial evidence nga ilang gihuptan sama sa gipirmahan nga affidavit sa silingan ug apuhan sa syete anyos nga biktima.
Matud pa ni Fores nga gidaygan sila sa taga piskalya apan dili na dawaton pa ang reklamo tungod patay na ang gitudlo nga suspek hinuon gipasumite na lamang ang kapulisan ug special investigation report.
Kahinumduman nga dihang miatubang sa Sangguniang Panlungsod si Major Fores giangkon niini nga wala silay witness sa maong panghitabo apan ilang gibasihan sa ilang imbestigasyon ang autopsy report sa National Bureau of Investigation nga posebible namatay ang biktima usa ka oras human kini mikaon tungod sa stomach content.
Apan luyo sa ilang paningkamut ug pagsunod sa proseso sa imbestigasyon negatibo ang mga butang nga ilang gipailawom sa examination. Wala usab nila matultulan asa ang primary crime scene.
