GENERAL SANTOS CITY – Nakaplagan nga wala nay kinabuhi ang usa ka lalaki nga nagpangalang si Ermilendo Sajul Sajulga, 74 anyos, residente sa Purok 9, Barangay Conel ning dakbayan nga usa sa mga person of interest sa kamatayon sa 7 anyos nga menor de edad nga si Princess Arian Cabucos.
Base sa impormasyon gikan sa mga kapulisan, mga alas 11:47 ang takna kagabii, nakadawat ug tawag ang ilang opisina gikan sa usa ka concerned citizen sa gikaingong insidente nga giunay pagkutlo sa biktima ang iyang kaugalingong kinabuhi.
Paghidangat sa mga otoridad sa lugar, gikumpirma nga positibo ang maong taho.
Sa inisyal nga imbestigasyon, gibutyag sa nagpangalang Henry C. Ruiz apo sa biktima, pag-abot niini sa ilang balay gikan sa Guadalupe, Barangay Conel, wala sa panimalay ang biktima maong iyang gipangita.
Apan nakuratan kini dihang nakita ang lawas sa iyang apohan nga nagbitay na sa punuan sa kahoy nga tambis gamit ang pisi nga nahigot sa liog sa biktima nga miresulta sa iyang kamatayon.
Kahinumdoman nga nahimong person of interest ang biktima sa kaso nga pagpatay sa 7 anyos nga si Arian nga gikaingong gilugos, nakahiagom ug daghang bun-og ug bali sa lawas, lakip ang naangkon nga traumatic injury sa utok nga nasagulan ug dugo dayon gisulod sa sako ug gilabay sa kasagbutang bahin sa Purok 9, Barangay Conel.
Sa karun, padayon ang imbestigasyon sa kapulisan sa kamatayon sa 74 anyos ug nakatakda usab nga ipagawas ang dagan sa imbestigasyon sa kaso ni Arian.
