GENERAL SANTOS CITY – Midepensa ang Department of Public Works and Highways(DPWH)12 nga wala gipasagdan ang road concreting project sa Kalpidong Glan Sarangani Province luyo sa nahitabo nga kapalpakan sa pagbuhos ug semento nga wala maisyuhan ug pouring permit sa maong buhatan.
Matud ni Ellen Torino, Chief Public Affairs and Information Staff sa DPWH 12 nga gipaningkamutan sa ilang buhatan nga masunod ang protocol sa project implementation bisan pa ug layo ang gikahimutangan.
Kini human gipaniguro nga gipatuman ang mga estrikto nga patakaran aron madepensahan ang pondo sa gobyerno nga gigamit sa paghimo ug proyekto.
Human giangkon nga daghan nga proyekto ang gimonitor sa ilang Project Engineer hinungdan nga wala mabantayan ang road concreting sa Kalpidong nga gibuhusan ug semento bisan ug kulang ang preparasyon.
Una nga giangkon ni Torino nga nahadlok nga musaka sa lugar ang ilang Project Engineer tungod nakadawat ug bahad sa mga armado.
Nasuta nga kung adunay proyekto ang DPWH kinahanglan gayud nga may Engineer nga anaa sa lugar aron magmonitor sa trabaho hangtud kini mahuman.
Kahinumduman nga gipabakbak sa DPWH ang gibuhos nga semento human nakadawat ug reklamo gikan sa mga residente.
