GENERAL SANTOS CITY – Mipasalig si PMAJ ROBERT FORES Hepe sa Police Station 9 nga ilang imbestigahan ang nahitabong pugos nga pagkumpiska sa mga paninda ug andam sila nga i-assist ang mga reklamo sa mga vendors.
Dugang pa niya, kung magpahigayon ug demolisyon sa usa ka lugar, kinahanglan ang dokumento sama sa court order aron legal ang pagpatuman niini.
Nahimong dakong samok ang gipahigayong road clearing operation sa Barangay Conel, human nga giapil ug kumpiska sa mga barangay tanod ang mga paninda nga isda ug gulay sa mga vendors nga nakadisplay mismo sa ilang pribado nga luna.
Makita sa CCTV footage nga gi-surender sa mga reklamante sa Bombo Radyo Gensan ang pwersahan nga pagkumpiska sa mga produktong isda ug gulay sa mga tindahan.
Personal nga miduol ang mga reklamante sa Bombo Radyo Gensan ug ilang gisaysay nga titulado ang ilang pwesto ug pribado ang ilang luna.
Matod pa kang Carlinda Noriega, usa sa mga reklamante, nga kumpiyansa sila nga road clearing ang buhaton sa mga opisyal apan nakuratan sila nga pati ilang paninda nga wala sa kadalanan gi-apil ug kumpiska sa mga nahisgutan.
