GENERAL SANTOS CITY – Laing pagpamusil ang natigayon sa GenSan niining katapusang adlaw sa bulan sa Hunyo kung asa patay ang usa ka traysikad driver.
Giila ang biktima nga si More G. Penton, 35 anyos, minyo, residente sa Purok Mudia, Barangay Labangal, ning syudad.
Sa inisyal nga giimbestigasyon sa kapulisan, gipusil ang biktima alas 9:15 ang takna kaganihang buntag sa Purok Emiliana, Barangay Calumpang.
Nasuta nga sakay ang biktima sa iyang traysikad uban sa iyang live-in partner gikan sa ilang balay sa Purok Mudia, apan pag-abot sa nahitabuan sa krimen, kalit lang kining gipusil sa duha ka wala pa mailhing suspetsado.
Human sa pagpamusil, paspas nga nikagiw palayo sa lugar ang mga suspek.
Sa karon, padayon pa ang gihimong imbestigasyon sa kapulisan kalabutan sa maong insidente.
