GENERAL SANTOS CITY – Giangkon ni City Director PCol. Jomar Alexis Yap nga nalisuran sila sa imbestigasyon kalabutan sa natigayon nga pag pamusil patay kang PSMS Petecellier Licanto nga usa sa mga miyembro sa Police Intelligence Unit nga naka destino sa Sarangani Provincial Police Office.
Sumala pa sa nasampit nga opisyal nga usa sa tutukan nga anggulo sa krimen mao ang trabaho niini isip pulis, gibutyag usab niini nga ang biktima ang sakop sa nagkadaiyang mga anti-criminality campaign hinungdan nga wala gipadaplin sa kapulisan ang trabaho niini sa ilang gipahigayon nga imbestigasyon.
Apan abli usab ang mga nasampit nga mga otoridad sa mga uban pang anggulo nga posibleng personal nga transaction ang hinungdan sa kamatayon sa biktima.
Dugang pa ni Pcol. Yap nga nakig alayon na sila Sarangani PNP kalabutan sa maong insidente lakip na sa pamilya sa biktima aron na ma tumbok gilayon ang hinungdan sa pag pamusil sa nasampit nga pulis.
Kahibaluan nga ang biktima ang gipusil patay atubangan sa usa ka kan-anan sa Quezon avenue, Brgy. Dadiangas North ning dakbayan sa duha ka suspek nga sakay sa usa ka XRM nga motorsiklo.
