GENERAL SANTOS CITY – Marijuana ug ‘shabu’ gihapon ang nag-unang suplay sa ilegal nga droga sa Rehiyon-12 sumala sa datus sa Philippine Drug Enforcement Agency.
Base sa report sa PDEA-12, nasakmit sa ilang ahensya ang kapin sa P-12 milyones nga kantidad sa shabu ug marijuana sa unang quarter sa 2023 sa kapin 220 ka anti-drug operations nga ilang gilusad sa miaging tulo ka bulan.
Gibana-banang 1.2 ka kilo nga ‘shabu’ ang nasakmit samtang 577 gramos nga dahon sa marijuana ug 21,000 ka punoan sa kahoy ang nasakmit sa maong anti-drug operation.
Sumala pa kang PDEA-12 regional director Aileen Lovitos nga moabot sa 257 ka mga suspek lakip na ang 31 ka mga high-value target ang nasikop sa nasangpit nga anti-illegal drug operation sa nagkadaiyang lugar sa Region-12 nga naglangkob sa mga probinsiya sa North Cotabato, South Cotabato, Sultan Kudarat, Sarangani ug General Santos City.
Gihingusgan sa PDEA-12 ang kampanya batok sa ilegal nga droga aron mahimong drug-free na ang 1,095 ka barangay sa tibuok rehiyon.
Sa talaan sa PDEA-12, anaa lang sa 114 ka barangay sa Rehiyon 12 ang apektado gihapon sa ilegal nga droga.
