GENERAL SANTOS CITY – Usa-usa nga gitubag ni Kag. Dominador Lagare Jr., chairperson sa commitee on transportation sa Sangguniang Panlungsod ang panawagan sa ubang mga tricycle drivers sa dakbayan nga maghawa isip chairman sa komitiba sa transportasyon.
Matud pa niini nga walay problema kaniya kung muhawa isip chairman sa maong komitiba kung asa iyang gihimo na sa miaging katuigan apan subli nga gibalik kaniya.
Gikadugang pa sa nasampit nga opisyal nga sa hisgutanan sa pagpangdakop sa mga colorum nga tricycle, iyang gihingusgan nga trabaho sa executive department og dili sa chairperson sa commitee on transportation sa Sangguniang Panlungsod.
Apan iyang gipaklaro nga dili pa pwede nga manakop og sa mga gabiyahe nga colorum tungod anaa pa sa proseso sa Sangguniang Panlungsod ang pag-aproba sa aplikasyon sa prangkisa.
Kahibaluan nga atol sa session sa SP sa miaging adlawng Martes may nagprotesta batok kang Lagare nga gipanawagan ang iyang paghawa isip chairman sa committee on transportation sa Sangguniang Panlungsod.
