SARANGANI – Kinasing-kasing nga gidawat sa lokal nga panggamhanan sa Alabel Sarangani Province ang pagbalik sa sabakan sa gobyerno sa lima ka mga surrenderee nga kanhing mga miyembro sa walhong grupo.
Pamahag ni Gov. Rogelio “Ruel” D. Pacquiao, ngadto sa mga nasangpit, nga bisan nasaag man sila kaniadto, apan dili kini babag alang sa pagsugod sa bag-ong kinabuhi.
Gipasalig pa sa Gobernador nga dungan sa ilang pagbag-o, anaa lamang ang gobyerno aron mo-assist sa ilang mga panginanglanon hilabi na sa ilang pagsugod.
Gipresenta ni 73rd Infantry Batallion Philippine Army Commanding Officer Lt. Col. Antonio Quimado ang nahisgutang lima ka mga kanhing miyembro sa walhong grupo gikan sa munisipyo sa Malapatan lakip na ang mga armas nga gilangkuban sa tulo ka M16 Rifle ug usa ka M14 Rifle.
Sa pikas bahin, padayon usab ang panawagan sa Gobernador ngadto sa mga nagpabiling miyembro sa mga walhong grupo nga mobalik na sa sabakan gobyerno gumikan adunay maayo nga mga programa ang giandam alang kanila.
