GENERAL SANTOS CITY- Mihangyo ang lokal nga gobyerno sa dakbayan sa Heneral Santos sa publiko nga magpabakuna batok sa COVID 19 atol sa Bakunahang Bayan nga may tema nga “Biyayang Proteksyon sa Paskong Pilipino” nga gikatakda sa December 5 hangtud 7, 2022.
Ang target nga makapabooster ang mga vaccinated citizens nga mga residente sa dakbayan.
Adunay vaccinations sa mga malls lakip na sa mga health centers. Ang mga pwede nga makadawat og unang booster dose ang mga nagpangidaron og 12 anyos pataas.
Apan kadtong mga edaran og may sakit mas giawhag nga magpa-second booster dose aron nga madugangan ang immunity sa lawas batok sa COVID 19.
Mahinungdanon ang booster dose aron may igong proteksyon batok sa nagkadaiyang variant sa COVID 19.
Sa labing ulahing report anaa sa 416,180 o kaha 89.78% ang fully vaccinated sa dakbayan, kung asa 89,792 ang nakadawat sa unang booster dose og 12,489 ang may second booster dose.
