GENERAL SANTOS CITY – Mokabat sa 1,000 ka mga estudyante, civic organization groups, PNP personnel, ug uban pang mga local sector ang misalmot sa gilusad nga “Buhay Ingatan, Droga Ayawan” o BIDA Program sa PNP nga gipahigayon sa General Santos City Gymnasium kagahapon.
Sa wala pa ang pormal nga paglusad sa kalihokan, adunay usa ka fun run ug zumba nga gipahigayon. Tumong sa maong programa nga ipadayon ang hugot nga kampanya batok sa ilegal nga droga.
Samtang buot usab sa otoridad nga mosalmot ang komunidad sa pakigbatok niini. Alang usab kang Mayor Lorelie Geronimo Pacquiao, dako og katungdanan ang mga katawhan sa lungsod nga magpabiling drug-free ang komunidad.
Matud pa niya nga dili lang kini katungdanan sa gobyerno, apan katungdanan usab kini sa matag tawo.
Busa iyang giawhag ang tanan nga magtinabangay sa mga maayong paningkamot sa gobyerno alang sa katawhan. Samtang misaad usab ang kapulisan nga matinud-anon sila sa mga lakang, tumong ug tuyo sa ilang mga kalihokan.
