REGION 12 – Luyo nga napasakaan na og kasong paglapas sa Republic Act 11479 kon Anti-Terrorism Act of 2020 ang suspek sa pagpamomba sa bus sa Tacurong City nga si Esmael Daomilang, 55-anyos, apan padayon ang imbestigasyon sa kapulisan sa mga kaubanan niini.
Kahibaluan nga ang nasampit ang lakip sa 11 nga nasamdan sa insidente og naputlan sa tuo nga bahin sa tiil.
Gibutyag ni Police Major Rissa Hernaez, Assistant PIO sa Police Regional Office 12, nga natigayon ang ‘premature explosion’ tungod sensitibo ang improvised explosive device.
Matud pa nga gilayon nga mibuto ang bomba bisag wala pa nakapanaug sa bus ang suspek hinungdan aron maapil kini sa mga nasamdan.
Kahibaluan nga ang bus ang may body number 2588 sakay ang 29 ka pasahero kung asa nahitabo ang insidente dihang pasulod na unta sa Public Terminal ang bus.
Nasayran nga gawas sa unang mibuto, aduna pay narekober nga IED ang EOD team.
