GENERAL SANTOS CITY – Gilusad karon sa Police Regional Office 12 ang Project Horse o Hinterland Operational Response for Services and Emergencies sa probinsiya sa Sarangani, pinaagi sa pagpanguna ni Police Brigadier General Jimili Macaraeg.
Ang nasampit nga proyekto namugna human nakita niiini ang kamahinungdanon sa mga kabayo ngadto sa mga hilit nga dapit sa Probinsiya sa Sarangani sa pagahatod og serbisyo panahon nga dunay emerhensiya nga mga panghitabo.
Gibutyag niini nga sama na lang niadtong nahitabo nga dunay pagpanigbas nga gikaangol sa 5 ka mga bikitma nga gikinahanglan dad -on sa balay tambalanan apan nahimong lisod sa nasampit nga madala dayon sa hospital gumikan sa naa pa sa kinse kilometres ang lakaw nga lisod ang dalan gumikan sa kabukid.
Maoy hinungdan nga iyang gilusad kini nga proyekto nga makapalit og kabayo aron maoy ipagamit sa kapulisan sa pagresponde, paghatod og mga hinabang sa manginahanglan.
Napili nila ang kabayo nga silbing himoong transportasyon gumikan kay ang kabayo ang pinakamaayo nga pamaagi sa paglatas sa kabukiran.
Plano sa nasampit nga opisyal nga kini ipatuman sa tibook rehiyon dose asa itunol kining mga kabayo sa mga Police Provincial Office gumikan kay sila ang nasayod sa mga lagyo nga mga dapit sa ilang mga area of responsibility.
