SARANGANI – Pangitaan ug paagi sa mga magtutudlo ug mga ginikanan nga apil ang Lun Padidu Elementary School sa full face to face classes karong Nobyembre dos.
Kini ang pahayag sa Parents Teacher Association samtang gipangitaan ug paagi nga makapabarug ug temporary makeshift building nga kabutangan sa mga bata nga nagtungha sa Kindergarten, Grade One ug Grade two.
Kini human naugdaw sa sunog ang onse ka classroom niadtong gabii sa Huwebes.
Una nga gibutyag ni DepEd Schools Division Superintendent Gildo Mosqueda nga nakapadala na ug report sa DepEd Central Office kalabutan sa nahitabo nga sunog samtang apil usab nga gipadala ang request nga magpatukod ug bag-ong school building.
Sa kasamtangan ilang gihangyo ang Lun Padidu National High School nga gamiton ang unom ka classroom dungan sa paggamit usab sa gymnasium aron magamit nga lawak tulunghaan.
Gikumpirma usab ni Mosqueda nga nag- overload ang linya sa kuryente sa usa sa mga lawak hinungdan nga nasunog ug mikatay sa tapad nga mga lawak ang kalayo.
Giangkon sa opisyal nga kaniadto pa ginapahinumduman ang mga magtutudlo kalabutan sa safety sa ilang mga classroom.
