GENERAL SANTOS CITY – Giatangan sa Sangguniang Panlungsog kung kinsa ang ituboy ni City Mayor Lorelie Pacquiao nga hulip kang kanhi City Councilor Shandee Llido Pestaño isip City Administrator dinhi sa Dakbayan.
Kini human nga wala giaprobahan sa konseho sa Syudad ang concurrence ni Pestaño alang sa maong posisyon.
Sa nahitabo nga sesyon miaging adlaw, sa iyang privileged speech giusa-usa ni Kag. Beth Bagonoc, ang Chairperson sa Committee on Appointment nga napakyas si Pestaño nga mosumite sa mga gikinahanglan nga dokumento.
Gihatagan sa Konseho ug paigong panahon ang nasampit aron nga asikasuhon ang nahisgutang dokumento apan hangtud sa karun walay gisumite.
Lakip sa gipangayo nga dokumento sa SP kang Pestaño ang iyang transcript of records kon TOR nga maoy usa sa mga rekositos aron makalingkod isip City Administrator.
Sa nahitabong regular session, silang Kag. Odjok Acharon ug Kag. Richard Atendido ang wala mipabor nga ibasura ang appointment ni Shandee Pestaño.
