GENERAL SANTOS CITY – Patay ang amahan ug tres anyos nga anak samtang padayon pang ginatambalan ang lain pang napulo human nabanggaan sa 10 wheeler truck nga may karga nga 20 footer container van ang pundok sa mga sakyanan dungan sa pag-pamauli sa mga estudyante sa SEAIT Tupi, South Cotabato.
Basi sa imbestigasyon sa Tupi Municipal Police Station padulong sa Koronadal City ang direction sa nahisgutang cargo truck dihang nawad-an ug break samtang palugsong na sa poblacion Tupi South Cotabato.
Daghan sa mga estudyante nga bag-o migawas sa tulunghaan ang nakakita dihang gibanggan sa truck ang usa ka gamay nga kotse ug gisodsod sa semento nga dalan hangtud mihunong.
Sa pahayag sa usa ka estudyante nga samtang gapaabot ug kasakyan pauli sa Polomolok kalit lamang miagi ang cargo truck sa ilang atubangan ug nakita gayud ang pagkabangga sa dakong truck sa kulay pula nga kotse ug gibagnos niini sa taas nga distansiya.
Nagsagul matud pa ang ilang gibate dala sa kakulba sa ilang nakita nga sa pagsaysay nga na trauma sila sa sitwasyon tungod daghan sa mga kauban nila nga estudyante ang mitabok sa dalan dihang miagi ang dakong sakyanan.
Nasuta nga apil sa nakaangkon ug danyos sa mga sakyanan ang usa ka bus, duha ka pick-up, usa ka Innova ug duha ka motorsiklo.
Pipila sa mga biktima ang giila nga silang Marelle Puno Maravilla, Eduardo Ajeno, Vergel Viali, Ronnel Magayo, Ronnel Verbal, Krizel Flandez, Jennifer Daquil, Kristene Mae Baduraya, John Carlo Pamonero, Janelle Ungab ug uban pa ang nadala sa tambalanan.
Samatang gikustudiya na sa Tupi Municipal Police Station ang driver sa cargo truck.
