GENERAL SANTOS CITY – Gilugwayan pa sa Traffic Enforcement Unit sa General Santos City Police Office ug pipila pa ka adlaw una ang pagpangdakop sa mga kulurom nga tricycle sa Syudad.
Kini ang gikumpira ni Police Lieutenant Colonel Dominador Palgan Jr. ang labaw sa Traffic Enforcement Unit sa General Santos City Police office.
Sumala pa sa nahisgutan nga mao kini ang nahimong hangyu kanila ni Gensan City Mayor Lorelie Pacquiao sa ilahang nahimong panagpulong kauban ang chairman sa komitiba sa transportasyon sa konseho nga si Kag. Dominador Lagare Jr.
Dugang pa ni P/LTC Palgan nga pinaagi niini mahatagan pa ug oras ang mga driver nga maka-apil na sa mga koopiratiba sa tricycle nga apple green, pula ug puti.
Apan gipaklaro usab niini nga hangtud lamang sa Oktobre 21 ang ilang ihatag nga oras sa mga kolurom nga tricycle, gumikan paglampas matud pa sa maong petsa mag sugod na sila sa pagpanakop sa mga kolorum nga tricycle nga gilangkuban niadtong wala mu-apil ug unsa mang kooperatiba apan naga biyahe-biyahe.
