GENERAL SANTOS CITY – Dakpan sa hiniusang pwersa sa kapulisan ang usa ka nagtago nga high value target human makorner sa gipahigayon nga buy bust operation.
Nasikop ang suspek sa National Highway, Sitio Mariva, Brgy. Gapok, Senator Ninoy Aquino, Sultan Kudarat miaging adlaw.
Giila ang dinakpan nga si Dilmo Ali Abas a.k.a “Toto”, 35 anyos myembro sa Moro Islamic Liberation Front (MILF), 105th Base Command, Alpha company ug myembro sa Inner Defense Force.
Nagpahigayon ug buy bust ang nagkahiusang pwersa sa kapulisan sa lain laing departamento gamit ang one-thousand-peso bill ug napalit ang tulo ka dagko nga sachets nga may 15 grams.
Dihang gi search ang lawas sa suspek nakuha ang usa ka gatus pa ka gagmay nga sachets nga may timbang nga 5 grams nga gituhuang shabu nga nakabutang sa itum nga pitaka.
Nakuhaan usab ang suspek ug ID sa ilang grupo.
Katibuk-ang 104 ka sachet sa gituhuang shabu ang nakuha nga may kantidad nga Php 149,600.00.
Padayon nga gina imbestigahan ang suspek samtang giandam ang pagpasaka ug kaso sa kasupakan sa comprehensive dangerous drugs act of 2002 samtang kustudiya ang mga otoridad.
