SARANGANI PROVINCE – Patay ang gituohang sakop sa New People’s Army (NPA) samtang usa ang nadakpan sa engkwentro tali sa kasundalohan sa Purok 7, Barangay Zion, Maitum, Sarangani Province.
Matud ni Lt. Col Michael Angelo Candole ,commander sa “Task Group Bangis” ilawom sa 6th Infantry Division, ang napatay giila nga si Gilbert Matingkal, 23-anyos ug ang nadakpan si Ronel Matingkal 18-anyos.
Ang mga nasangpit miyembro sa Guerilla Front- Musa ilawom sa nabungkag na nga Far South Mindanao Region (FSMR) ug mga residente sa Barangay New La union Maitum.
Gibutyag sa opisyal, giimbestigahan nila kung paryente ang napatay ug ang dinakpan kung asa naimbargo nila sa dinakpan ang .45 kalibre sa pusil.
Dugang sa opisyal, nagpahigayon sila sa lugar og focused military operation dihang nakatagbo nila ang grupo sa mga indibidwal nga gituohang sakop sa NPA, og sila gipabuthan maong didto nagsugod ang engkwentro.
Sa karon mokabat na sa 11 ka sakop sa NPA ang gikaengong napatay gikan Enero hangtud ning kasamtangang bulan.
