GENERAL SANTOS CITY – Anaa na sa state of decomposition na ang patayng lawas sa usa trabahante nga nakaplagan sa General Tuna Corporation (GENTUNA) sa Prk. Lansong Brgy. Tambler ning syudad. Nailhan ang maong trabahante nga si Jerwin Yaman Ukom, 25 anyos, ulitawo, nagtrabaho ilawom sa Centro Agency, residente sa Purok 3, Talcon, T’boli South Cotabato.
Base sa pamahayag sa management sa maong canning factory nga na-assign matud pa isip towing crew ang biktima sa maong planta. Ulahi nga nakit-ang nagduty ang biktima kaniadtung Agosto 6, 2022 ug sukad sa maong adlaw wala na kini nakita pa.
Saysay sa mga kaubanan niini nga nagtuo sila nga basin ug nakauli na kini sa ilang lugar. Apan nakurat na lamang sila dihang nakaplagan nga wala nay kinabuhi sa tunga sa duha ka fish bin og nadugta na ang lawas sa nasangpit.
Matod sa SOCO nga nagresponde sa lugar ug sa lawas sa biktima, nga wala silay nakitang foulplay.
Sa kasamtangan, anaa na sa usa ka lokal nga punerarya ang patayng lawas sa biktima samtang padayon ang gihimong imbestigasyon sa Tambler Police Station sa maong insidente.
