GENERAL SANTOS CITY – Adunay ginasunod nga proseso ang mga Rescue Worker kung adunay mga mahitabong disgrasya sa kadalanan. Mao kini ang pagpaklaro ni Volunter Rescue Worker Francis Antopina nga nakabase dinhi sa syudad ang iyang area. Matod sa nasangpit, lakip sa iyang area mao ang Fatima, Tambler ug Calumpang apil ang San Jose tungod nakabase siya sa Mindanao State University. Apan sa nahitabo nga disgrasya sa Batomelong dili na kinahanglan nga sundon pa ang area of responsibility tungod lakip usab sa ilang ginasunod nga dako man o gamay nga mga disgrasya sa kadalanan basta may tawag ila kini nga respondihan.
Samtang mensahe usab niini sa katawhan nga kung may susama nga panghitabo, mutawag gilayon sa mga ahensiya sa gobyerno nga maoy muresponde. Importante matod pa nga kinahanglan gayud nga magbaton ug emergency contact numbers.
Base sa kasinatian sa maong panghitabo, saysay niini nga may miabut nga mga tawo ang nag sige hinuon ug kuha ug video imbes mupadaplin. Ang uban mipatunga pa hinungdan nga nalangan apil ang mga sakyanan nga muagi. Saysay usab niini nga dili na masunod ang kagustuhan sa mga tagtungod nga unahon ang ilang kabanay nga naapil sa aksidente tungod magdepende ang mga Rescue Worker sa sitwasyon sa pasyente.
