General Santos City | Gipahunong una sa mga Local veterinary officials sa pagbuhi ug baboy ang mga hog raisers sa South Cotabato gumikan sa nagkadaghan nga kaso sa African swine fever (ASF) infections. Gihimo ang panawagan sa bag-ong ASF infections sa pipila ka lugar sa Banga ug Surallah nga gikaingon nga ASF hotspots human ang kamatay sa gatusan kapin ka mga baboy sugod niadtong bulan sa Marso.
Matud ni Koronadal City veterenarian Charlemagne Calo nga hunungon una ang produksyon ug pagpalapad sa babuyan human gibutyag ni South Cotabato provincial veterenarian Flora Bigot nga napulo ka lugar sa Banga ug lain pa sa Surallah ang gi categorized nga “ASF red zones” gumikan sa kompirmado nga infections.
Samtang gipailawom sa monitoring ang mga baboy sa Lake Sebu, Norala, Santo Niño, Tantangan, Tupi, ug T’Boli, ug tanang barangay sa Koronadal City sa posebli nga infections. Gani dobleng estrikto ang Animal quarantine checkpoints sa Koronadal pinaagi sa pagpatuman sa biosecurity procedures, pagdili sa pag transport sa mga baboy, karne ug processed pork gikan sa mga silingan nga dapit hilabi na ang ASF-hit areas.
Natultulan na ang baboy nga sinugdanan sa infection sa Banga samtang sa Surallah ang infection nagsugod sa usa ka barako nga gigamit nga breeder.
