General Santos City | Balhug sa selda sa Tambler Police station ang bana human gidunggab patay ang asawa nga dili na makigbalik kaniya. Gilayong gidakop ang suspek nga si Fernando Rabin 60 anyos residente sa lower puting bato, Calumpang samtang ang biktima mao si Maileen Rabin 56 anyos lumulupyo usab sa lugar.
Migawas sa imbestigasyon nga upat ka bulan ng walay klaro ang komunikasyon sa mag-asawa luyo nga ginapangulitaw-an sa bana ang asawa aron makigbalik kauban sa lima nila ka anak. Ang suspek ang kanhi busero apan karon wala nay trabaho tungod sa iyang edad samtang nagtrabaho nga sweeper ang asawa.
Nakig estorya matud pa ang suspek sa asawa apan hugtanon gihapon ang asawa nga dili na makigbalik pa nga nagresulta sa pagpangduggab makaduha ka higayon nga nagresulta sa pagkamatay sa biktima. Kini human gihandusan sa suspek ang tiyan nga bahin sa biktima gamit ang usa ka kutsilyo.
Human makadawat ug impormasyon ang kapulisan gilayon nilang girespondihan ug gidakop ang suspek samtang gidala sa hospital ang biktima apan gibawi-an kini sa kinabuhi. Nasuta nga nakalabay nga semana nagbahad na ang suspek nga iyang patyon ang asawa kung dili makigbalik kaniya.
