GENERAL SANTOS CITY – Nagnegatibo sa Aftrican Swine Fever(ASF) ang laboratory result sa 21 ka blood sample nga gikuha sa pito ka purok nga palibot sa Purok San Lorenzo Ruiz, Apopong ning dakbayan.
Matud ni City Vetirinary Office head Dr. Efraim Marin nga migawas bag-ohay lamang ang resulta.
Nasayran nga nagnegatibo usab ang enviromental swabbing sa slaughter house ug sa mga lechonan duol sa San Lorenzo busa nawala na ang kabalaka nga natakdan sa virus ang mga baboy sa duol nga lugar.
Apan karong adlaw subli nga balikan nilang Dr. Marin ang San Lorenzo aron sa pagpahigayon ug dis-infection nga ang tumong nga masiguro nga dili makaadto sa silingan nga lugar ug maapektuhan ang mga backyard ug mga commercial farm.
Subli nga gipahinumduman ang mga hog raisers nga dili mupalit ug baboy sa mga lugar nga kanhi na gikataho nga may ASF tungod tinuig pa ang palabyon una hingpit mawala ang virus.
Kini ang usa sa gituhu-an nga rason nganong nakaabut sa San Lorenzo Ruiz ang virus sa baboy nga dali mikatag sa mga backyard hinungdan kapin 500 ka baboy ang gipailawom sa culling aron kapugngan ang pagkatag sa maong sakit.
