GENERAL SANTOS CITY – Muagi pa og proseso una ma-extradite sa Amerika si Pastor Apollo Quiboloy.
Matud pa ni Atty. Psyche Fontanilla Mamadra, usa sa mga abogado sa dakbayan nga ang extradition ang gimbuhaton tali sa US State Department og sa Department of Foreign Affairs (DFA).
Gikadugang pa niini nga kung masuta nga may basehan mao pa ang pag-file sa kasong extradition sa Regional Trial Court (RTC) og ang maong korte ang magpagawas og warrant of arrest depende sa desisyon sa huwes.
Buot ipasabot nga ang pagbutang sa pangalan ni Quiboloy sa most wanted sa Federal Bureau of Investigation (FBI)ang dili basehan nga dakpon ang nasampit.
Gikadugang pa ni Atty. Mamadra nga dili makapagawas og hold departure order ang Department of Justice (DOJ) kang Quiboloy tungod wala kini kaso nga giatubang sa Pilipinas og wala pa usab nakig-alayon ang US State Department.
Nahimong hisgutanan ang kaso gumikan si Quiboloy ang nailhan ug impluwensyadong tawo nga suod kang Pangulong Rodrigo Duterte.
