GENERAL SANTOS CITY – May person of interest na ang kapulisan sa gipatay nga security guard sulod sa gibantayan niining establisiemento sa Makar Brgy. Labangal ning syudad.
Giila ang biktima nga si San Diego Teng, 42 anyos nga residente sa Uhaw Brgy. Fatima.
Matud pa kang P/Maj. Patrich Elma, hepe sa Makar Police Station, aduna nay grupo sa mga kawatan ang ilang gitutukan nga mga responsable sa krimen.
Gibutyag niini, nailhan ang mga biktima human nakita ang cctv kung asa nakit-an giunsa sa pagkulata og pagdunggab ang biktima nga hinungdan sa iyang kamatayon.
Gikadugang pa sa opisyal, una ang insidente adunay lookout ang mga suspek.
Giandam na ang kasong robbery w/ homicide nga ipasang-at sa kapulisan batok sa mga suspek nga sumala pa grupo sa mga kawatan nga maoy gitutukan usab sa ilang presinto gumikan responsable sa mga pagpangawat sa ilang area of responsibility.
Kahinumduman, nakita ang biktima nga nagbuy-od sa yuta og wala nay kinabuhi og may ubay-ubay nga samad-dinunggaban, og mga samad sa likod nga bahin sa ulo gawas pa nga guba kaayo ang nawong og nangatangtang ang pipila sa iyang ngipon human nga gitabangan og kulata sa mga suspek.
Nawala usab ang single motor sa biktima apil ang issued firearm niini.
