GENERAL SANTOS CITY – Gilayon nga gipailawom sa General Santos City Police Office (GSCPO) sa paraffin test ang gitudlong suspek sa Quintoy murder case nga si Ralph Gerald Andoy Sorabia alias Rap-rap.
Matud pa ni PCapt. Abdusalam Mamalinta , hepe sa San Isidro Police Station, hulaton pa nila ang resulta gikan sa Regional Crime Laboratory Office (RCLO 12) kung asa dinhi masayran kung mismo ang suspek ang nakapabuto og pusil may kalabutan sa krimen.
Una niini gikonsidera sa mga pulis nga suspek ang naunang natudlo nga person of interest sa maong krimen.
Gibutyag ni Mamalinta nga kuhaan og opisyal nga pamahayag si Sorabia nga anaa ang presensya sa iyang abogado.
Sa pamahayag sa nasampit nga opisyal nga miduol sa mga otoridad ang suspek aron malimpyo ang pangalan niini, human nga migawas nga usa sa mga giimbestigahan kalabot sa krimen.
Apan ang nasampit ang gitudlo sa usa ka menor de edad nga maoy testigo nga responsable sa krimen kung asa positibo niining giila pinaagi sa gallery sa mga hulagway nga gipresenta kaniya sa kapulisan.
Sa imbestigasyon nagkabangi ang biktima og suspek tungod sa personal nga mga problema nga may kalabutan sa personal nga isyu.
Ang suspek ang security admin officer sa Global Dynamic Star Security Agency, nga gipanag-iyahan usab sa kompanya sa gitrabahuan sa namatay.
Samtang ang biktima ang landlady usab sa suspek tungod kini ang usa sa mga boarders sa biktima.
