GENERAL SANTOS CITY – Nagpakita og hugot nga dedikasyon sa ilang trabaho ang anaa sa 16 ka nurses gikan Mindanao human nga gideploy sa mga Kauluhan aron mutabang sa pag-atiman sa mga pasyente nga nakaangkon og Coronavirus disease.
Nasayran nga puno karon ang mga ospital sa Metro Manila tungod sa pagdaghan sa mga pasyenteng nagpositibo sa Covid 19 sa National Capital Region.
Lakip niini ang walo ka mga nurses nga gikan sa Saint Elizabeth Hospital dinhi sa dakbayan sa Heneral Santos nga giila nga silang Norlaynie Abolais, Ryan Davis Cabarlo, Rex Congson, Geraldine Domanio, Elviro Firmalino Jr., Donna Lyn Juridico, Raffy Franz Manabat og Jayson Montano.
Sa dihang nakaabot sa Metro Manila ang mga nasampit og gipailawom gilayon sa quarantine og online orientation una i-deploy sa Cardinal Santos Medical Center.
Gawas sa walo ka mga nurses gikan sa GenSan, adunay upat pa nga nurses nga gipadala ang West Metro Medical Center sa Zamboanga og 4 usab nga nurses gikan sa Manuel J. Santos Hospital sa Butuan City.
Ang tulo ka Mindanao hospitals miyembro sa Metro Pacific Hospital holdings Incorporated.
Silang tanan ang wala magduha-duha nga magpadeploy sa Kauluhan tungod kini sa ilang gipanumpaan nga responsibilidad isip nurse ang tabangan nga mapaayo ang mga pasyente.
Nasayran nga nakadawat na og kumpletong bakuna ang mga nasangpit nga volunteer nurses.
Kahinumduman nga kaniadtong April 15, 2020 nagpadala usab og walo ka nurses ang Saint Elizabeth Hospital aron mag-augment sa mga ospital sa Manila human sa pagdaghan sa mga nagpositibo sa Covid-19.
Una niini, miapela ang independent group nga OCTA Research sa gobyerno nga dugangan pa ang pwersa sa healthcare workers sa Metro Manila tungod sa padayon nga pagsaka sa ihap sa COVID-19 cases sa rehiyon.
Gibutyag sa maong grupo nga pwedeng ipadala sa gobyerno sa NCR ang healthcare workers gikan sa “low-risk” areas o mga lugar nga adunay ubos nga kaso sa coronavirus.
